個人了解，身邊99%男人對婚姻最多係唔抗拒
而唔會由衷地渴望。
有留言話：一個聰明嘅女人係可以令男朋友想娶自己⋯⋯
那麼，讓我做隻女鬼去附上您的身體。
//
女人同男人有一個永遠嘅距離係女人去到三十歲附近就會想結婚，而男人去到三十歲先係人生真正開始⋯⋯女人成日會用三十歲去分界，大概因為女人喺三十五歲之後生仔已經係高齡產婦，所以三十歲結婚就係幾合適嘅時間。而另一方面，九成女人喺細個嘅時候都會對自己嘅婚禮有幻想有期待，女人真係會有種「我想同愛人組織家庭」嘅心願。婚姻對於大部分女人來說，都係有種吸引嘅魔力。而呢種心態係男人永遠都唔明白，因為婚姻對大部分男人來說，都只係一張紙一種形式。
我真係從未聽過一個男人口中會講出「我好想結婚！好憧憬自己個婚禮呀⋯⋯」呢啲充滿少女心嘅說話。於是我真係好好奇，究竟男人係咪都唔會好似女人咁好想結婚？
我問過身邊好多快將步入三十嘅男人，而大家都係同我講婚姻嘅不必要，「都係一張紙啫」、「都係為生仔啫」、「都係滿足另一半咋」，而有啲更話我知佢害怕結婚，唔係因為佢想做playboy，而係單純地覺得婚姻嘅責任太大啦⋯⋯我問身邊正計劃結婚嘅一個男性朋友，你點解會想結婚？佢話：「女朋友差唔多三十歲，都要負責任嘅」，然後我問咁你自己想唔想，佢話「唔會係叫好想結婚，只係唔抗拒而又覺得要負責任。」
究竟係男人三十歲未會想結婚吖，定係男人根本唔會渴望婚姻？女人眼中最憧憬嘅夢幻浪漫婚禮，喺男人眼中最多都只係一樣唔抗拒嘅責任？嗯⋯⋯真相對女人來說，可能都係唔知好過知。
/
ig: hkgirlfriend
港女友 Hong Kong Girlfriend.
Search